hoddion | Симеон Нов.Богослов +

"70. Притворяющихся добродетельными и кожею овчею по образу ино являющих,
ино же сущих по внутреннему человеку, всякия негли исполненных неправды, полных
зависти и рвения, и сластей злосмрадия, яко бесстрастных множайше и яко святых
чтут неочищенно имуще душевное око, ниже познати их могуще от плодов их.
Во благоговении и добродетели и простоте сердца пребывающих и святых сущих
воистину, яко прочих от человек пренебрегают, и презирающе их претекают
и за ничтоже вменяют.

71. Глаголиваго и тщеславнаго учительным пачи и духовным таковии быти вменяют:
молчаливаго же и от празднословия блюдущагося, невеждою и безгласным быти
утверждают.

72. Духом Святым вещающаго, высокомудреннии и гордостию диаволею недугующии, яко высокомудра
и горда отвращаются, от словес его уязвляеми паче, нежели умиляющеся. От чрева же или учений
тонкословствующаго, и противу спасения своего лгущаго, весьма похваляют и приемлют. И тако
никтоже есть из таковых добре, и якова есть вещь рассудити и увидети могущий" (Славянское
Добротолюбие, перевод с греческого Преп.Паисия Величковского). +